Cənubi Qafqazda ilk müstəqil hərbi informasiya agentliyi olan “MilAz” İnformasiya Agentliyi 2007-ci ilin iyul ayının 21-də müdafiə və təhlükəsizlik sektoru sahəsində uzun illər maarifləndirmə işi ilə məşğul olan ekspertlər tərəfindən yaradılıb.

“MilAz” sözü 2 ingilis sözünün – Military Azerbaijan – birləşməsindən əmələ gəlib və hərfi mənası “Hərbi Azərbaycan” deməkdir.

Cənubi Qafqazda ilk müstəqil hərbi sayt olan www.milaz.info saytı “MilAz” İnformasiya Agentliyinin rəsmi veb səhifəsidir. “MilAz” İA-nın yaradılmasnda məqsəd müdafiə və təhlükəsizlik sektoruna aid xəbər və məlumatların yayılmasına, bu sektordakı proseslərin öyrənilməsi və tədqiqinə müstəqil jurnalistlərin, QHT-lərin, geniş ictimaiyətin cəlb edilməsi vasitəsilə bu sahəyə ictimai nəzarətin gücləndirilməsinə və təhlükəsizliyimizin möhkəmləndirilməsinə dəstək verməkdir.

“MilAz” İA Cənubi Qafqaz ölkələrinin, o cümlədən Azərbaycanın müdafiə və təhlükəsizlik sektorunda həyata keçirilən islahatların mövcud vəziyyəti, perspektiv planları və s. barədə xəbər, məlumat, şərh və təhlil yayır, silahlı qüvvələrin, ayrı-ayrı qoşun növlərinin, hərbi birləşmələrin, müdafiə və təhlükəsizlik sektoruna aid edilən digər bütün qurumların fəaliyyətini, bu sektorda çalışan insanların sosial durumunu, müdafiə və təhlükəsizlik sahəsinə nəzarət problemlərini əks etdirən təhlil və araşdırmaları www.milaz.info saytında yerləşdirir.

“MilAz” İA həmçinin Azərbaycanın, eləcə də region ölkələrinin müdafiə və təhlükəsizlik sektorunu əhatə edən qanunvericiliyinin müasirləşdirilməsi və təkmilləşdirilməsi istiqamətində ortaya çıxan məqamları gündəmdə saxlayır. Diqqət mərkəzində olan məsələlərdən biri Qafqaz ölkələrinin NATO ilə Fərdi Tərəfdaşlığa dair Əməliyyat Planlarıdır (IPAP). “MilAz” İA bu planlar çərçivəsində nəzərdə tutulan məqsədlərin həyata keçirilməsində vəziyyətin monitorinqinin nəticələrini daim ictimailəşdirir.

Yuxarıda göstərilənlərə nail olmaq üçün “MilAz” İnformasiya Agentliyinin idarə heyəti müvafiq dövlət strukturları, beynəlxalq təşkilatlar, yerli və xarici QHT-lər, QHT koalisiyaları, ekspertlər, KİV-lər və ayrı-ayrı jurnalistlərlə sıx əməkdaşlıq edir.

“MilAz” İnformasiya Agentliyi fəaliyyəti dövründə bir sıra layihələrdə informasiya dəstəkçisi kimi iştirak edib. 2009-cu ilin mart-iyul ayları ərzində NATO-nun İctimai Diplomatiya Bölməsi Azərbaycanın NATO ilə əlaqələrinə dair www.milaz.info saytında dərc olunan məqalələrin rus və ingilis dillərinə tərcümə olunmasına dəstək göstərib.